Ikastolako Agenda2030 martxan da!

Ikastolako Agenda2030a martxan da. Datozen bi ikasturteetan 7.garapen iraunkorreko helburuari helduko diogu eta Energia:bizitzaren motorra gaia landuko dugu denon artean. Ilusioz eta gogotsu gure ekolider eta lan taldeetako partaideak, bejon deizuela!

 

 

 

 

 

 
 
 

2022-2023 ikasturtea

Udako oporren ostean, lagunekin, irakasleekin eta lankideekin elkartu gara ikasturte berri bati hasiera emateko. 

Ikasketa eta bizipen ugari aurretik ditugula, ekin diezaiogun 2022-2023 ikasturteari!

 

Altzako Haur eta Gazteen bertso paper lehiaketa

Hiart Crespo Aizkorreta (LH 5), Nerea Garcia Beristain (LH 6), Danae Laumon (DBH 2) eta Aiert Valdivia Martinez (DBH 2) ikasleek Altzako bertsopaper lehiaketako sari nagusia irabazi dute. Aipamena jaso duten lanen artean ere badira gure ikasleak: Nahia Barrutia Baz (LH 6), Indara Sanchez Dios ( LH 6) eta Saioa Franco Luis (DBH 2). 

 


 

Altzako XXII. Bertso Aroa bertso jaialdian banatu zituzten sariak. 

 


Bertsolari apartak!!

 

 

Aurrera, eraldatuz

Herri Ametsa ikastolako ikurra eguneratu dugu, garaian garaikora egokituz, gure nortasunari uko egin gabe. Lehengo kolore eta formak oinarri hartuta, naturari erreferentzia egiten dio ikur eraldatuak ere; itsasoa, zerua eta iratzea (berdegunea) batzen ditu, ikastolako inguruak bezalaxe.  

 

 

Eguneraketarekin batera, kamisetak atera ditugu gure izaera ameslaria lau haizetara zabaltzeko. Ameslariak gara eta amesten jarraituko dugu!

 

 
 

Sarituak Koldo Mitxelena Literatura lehiaketan

Herri Ametsa ikastolako lau ikaslek saria edo aipamena jaso dute 2022ko Koldo Mitxelena Literatura lehiaketan. Sarituak: Jurgi Portigo, LH6 (bertsoa) eta Hiart Crespo, LH5 (komikia) -saritutako lanak ikusteko klikatu hemen-. Aipatuak: Nahia Barrutia, LH6 (komikia) eta Erik Bravo, LH6 (komikia). Lau ikasleekin hitz egin dugu. 

 

 

Harrituta eta pozik daude Jurgi, Hiart, Nahia eta Erik, gelakideek aurreikusi omen zuten arren, ez baitzuten espero sari edo aipamenen bat izango zutenik. 

 

 

Jurgi Postigo izan da bertsoaren kategorian saritutako bakarra, gainontzekoek komikia aukeratu baitute. Espazioa izeneko lana Jurgiren bi zaletasunen arteko batura da: bertsolaritza eta espazioa. 

Kontatu digu trebea dela bertsolaritza saioetan eta difrutatu egiten duela bertsoak sortzen: errimak bilatzen, neurri zehatz bati egokitzen… 

Espazioaren gaia ere asko gustatzen zaio Jurgiri eta mundu ezezagun bezain txundigarri hori deskribatu du saritutako lanean. 

Saritutako bigarren lana ere, Hiart Cresporena, espazioan kokatzen da. Euri kosmikoa izeneko komikiak munstro baten bidaia kontatzen du, non euri “arraro” bat eta galaxia berri bat deskubrituko dituen. 

 

Nahia Barrutia pintura klaseetara joaten da eta lehiaketa bat dagoen aldiro aurkezten da, Koldo Mitxelena lehiaketara ezin hutsik egin beraz. Aitortu digu paisaiak eta erretratuak gustatzen zaizkiola gehien. 

Ametsak izeneko komikia izan da aipamena lortu duen lana eta bertan, lagun batek kontatu zion amets bat irudikatu du Nahiak: “Neska baten ametsak kontatu ditut, Covid19ak eragindako pandemia egoeragatik bete gabe geratu zirenak”. 

 

Erik Bravok, bere aldetik, gertaera erreal bat kontatu du Helaren istorioa izeneko komikian. Etxeko katua da Hela, Cordobako aterpe batetik ekarri zuten eta kotxez egindako bidaia luzearen ondoren, ingurura egokitu bitartean bizitako abenturak jaso ditu komikian Erikek; bizilagunei egiten zizkien bisitak, adibidez.  

 

Aurten ere, 14-18 urteko kategorietako irabazleek lantegi batean parte hartzeko aukera izango dute. Kategoria honetako bost irabazlek Arantzan antolatuko den lantegian parte hartu ahal izango dute Eusko Jaurlaritzaren Urruzuno Literatura Lehiaketako irabazleekin batera.

 
 
 

Irabazle Liburu Gaztea Booktrailer Lehiaketan!

DBH1B gelako Alex Torrecilla, Eñaut Vicente, Lara Sanchez eta Maia Zubeldiak (Pizza Taldea) Liburu Gaztea Booktrailer Lehiaketako lehen saria eskuratu dute DBH 1-2 kategorian. 

Juan Kruz Igerabideren Arrastoa (2020) liburuaren Booktrailer hau da saritutako lana: 

Epaimahaiak honakoa azpimarratu du: "Argumentuaren azalpen eta antzezpenak bikainak dira, oso ongi kontatua eta kokatua dago istorioa. Teknikoki zaindua, plano ederrak, karakterizazioa ere ona. Gozatu dutela nabari da eta horrek, ikusleari, irakurtzeko gogoa pizten dio". 

 

Oraindik indarrean dauden hainbat osasun eta segurtasun neurri direla eta, ikasgelako kide guztiek ezin izan dute Tabakaleran ospatu den sari-banaketa ekitaldira bertaratu. Hala eta guztiz ere, ikastolan geratu diren ikasleek saioa streaming bidez jarraitu ahal izan dute  zuzenean. Zuk ere eskuragai duzu ekitaldia esteka honetan (ikus 46. minutua):  

Sari potoloa eskuratu dute Alex, Eñaut, Lara eta Maiak: lau lagunentzako abentura txango bat eta liburu eta diskotan gastatu ahal izateko 200 euroko bonu bat. Merezitako saria, goza dezazuela!

 

Nekane Prieto dantzari eta ikasle ohiarekin solasean

Emakume dantzarien hilabetea borobiltzeko dantzaria den ikasle ohi bat gonbidatu dugu ikastolara: Nekane Prieto. LH6. mailakoek elkarrizketatu dute Verdini dantza konpainiako kidea eta oso esperientzia atsegina izan da. 

 

LHko etapako ikasle zaharrenek txalo artean jaso dute Verdini dantza konpainiako dantzari beteranoena. Galdera sorta ederra eskuartean eta zentzumen guztiak adi ezagutu dugu Nekane dantzaria eta ikasle ohia. Ikastolako etapa aspaldi bukatu zuen arren, pozarren bueltatu dela adierazi digu Nekanek eta halaxe sentitu gara gu ere bera gure artera ekarrita.

 

Txikitatik dantzaria izateak askotariko esperientziak bizitzea ahalbidetu dio, horien artean eszenatoki ugaritan parte hartzea. The Dancer telebista programan parte hartu zutenekoak bereziki bereganatu du ikasleen arreta. 

 

Verdiniko dantzari taldea mixtoa den arren, gaur egun oraindik sektore feminizatua da dantzarena. Hori dela eta, Nekanek dantzara animatu ditu “mutilak eta baita gizonak ere”. Hain zuzen, halaxe amaitu da, espontaneoki, elkarrizketa: dantzan. 

 

 

Eskerrik asko, Nekane! Laster arte!

 

22. Korrika ikastolan

Eguraldi euritsu bezain hotzak Bidebietan eta Altzan ospatzekoak ginen Korrika txikia eta gaztea ikastolan egitea behartu gaituen arren, sekulako giroa sortu dugu Herri Ametsan. 

Ikasle txikienetatik hasi eta zaharrenetaraino joan da lekukoa eskuz esku, eta ibilbidean zehar bizitako emozioak eztanda egin du denok batera dantzatu eta kantatu dugunean.

Aldarrikapenerako tartea ere izan da; DET taldeko June Rey ikasleak euskararen iraupena eta hazkuntza segurtatzeko behar eta merezi duen espazioa eskatu du.

 

 

Juul kanpaina

Juul kanpaina irakurketaren zaletasuna bultzatzeko Euskal Herriko ikastoletan antolatzen diren jardueren bilduma da. Hainbat ipuin irakurri eta entzun ostean, haur eta gazteek beraien liburu eta ilustratzaile gogokoena hautatzen dute. 

 


Herri Ametsa ikastolan urtarrilean hasi genuen lehen aldiz kanpaina, eta orain arteko balorazioa oso positiboa izan da. Lehen zikloan, irakurketa bideratua egin dute astean behin eta entzundako istorioa gustatu zaien edo ez paperezko loreetan islatu dute. Gainontzeko zikloetan, ikasleek bakarkako irakurketa egin dute egunero ikastolan zein etxean. Gainera, ikastolako txoko ezberdinak aste hauetan zehar irakurritako ipuinekin apaindu ditugu.

 


Martxoaren 31 hauteskunde-eguna izango dugu. Bertan, Lehen Hezkuntzako ikasle guztiek, seigarren mailakoek osatutako epaimahaiaren aurrean, beren liburu eta ilustratzaile gogokoenari emango diote botoa. Gero, kanpaina abiatu duen Nafarroako Ikastolen Elkarteari bidaliko dizkiote bozketaren emaitzak.

 

Juul kanpainaren inguruan gehiago jakin nahi baduzu, bisita ezazu ondorendo esteka:

https://www.nafarroakoikastolak.net/juul.asp

 

 

 

 

 

Eider Perez ikasle ohiarekin solasean

Emakume bertsolarien hilabetean bertsoaren mundua oso gertutik bizi duen ikasle ohi bat gonbidatu dugu ikastolara: Eider Perez Martinez. DET taldeko kideek elkarrizketatu dute eta DBHko lau mailetako ikasle boluntarioak bildu dira ikusleen artean. 

 

ETB1eko Hitzetik Hortzera saioko aurkezlea izateaz gain, beste hamaika saltsatan dabil sartuta Eider, denak ala denak sormenari lotutakoak. Sortzera animatu ditu, hain zuzen, ikasleak; haien zaletasunei tiraka eta gogoari jarraituta, bide berriak sortzen baitira nahi gabe, baita harreman sareak ere. Mundu berri bat deskubritzeko aukera bikaina izan daiteke Aste Santuko oporren lehen astean emango duen bi egunetako sormen tailerra. Apirilaren 11 eta 12an izango da eta 8-11 urte bitarteko haurrei (10:00-12:00) eta 12 urtetik gorako gazteei (12:00-14:00) dago zuzenduta. Pasaiako liburutegi batean izango da, baina oraindik ez dute zehaztu non. Parte-hartzaileak hitzarekin jolastuz trebatuko dira somenean. Hauxe duzue izen-emateko esteka. 

 

 

Horrez gain, euskara eta feminismoa ere presente egon dira elkarrizketan. Eiderrek argi utzi nahi izan du eremu erdaldunean bizi izanagatik, euskarak ez duela zertan bazterrean egon. Alegia, gaztelania eta euskara ez direla bateraezinak. Elkarbizitza osasungarria izateko, ordea, euskarari ere bere espazioa eman behar zaio eta gauza bera gertatzen da emakumeekin. Ez da kasualitatea Eider ikasle zen garaian DET taldeko gehiengo handi bat emakumezkoa izatea, gaur egun gertatzen den bezalaxe. Errealitate horren aurrean hausnartzera gonbidatu ditu ikasleak.

 
 

Loratu Herria

Udaberria hastearekin batera, Loratu Herria proiektuari ekin diogu ikastolan. Agenda 30 mugimenduaren bultzadaz jaiotako egitasmoa da. 

Loratu Herriaren helburu nagusiak denen artean intsektuak erakarriko dituen zelaiak eskola inguruan sortzea eta polinizatzaileen eta loreen babesgune izango diren eremuen sare bat sortzea dira. Horretarako, ezer baino lehen, ikastolan dauzkagun berdeguneak aztertu eta neurtu ditugu. Gero, mapa batean irudikatu eta ikastolako horma batean jarri dugu ikusgai. 

 

Gainera, ikastolan bi babesgune sortu berri ditugu. Batetik, berdegune bat hesitu dugu, intsektuen eta landareen babesgunea izango dena, eta bestetik, tximeleten santutegia sortu dugu. 

 

Datozen hilabeteetan eremu horien bilakaera aztertu eta ikerketa jarduera ezberdinak egingo dira bertan, etorkizunean gure ikastolako zein herriko berdeguneak hobetze aldera erabilgarriak izango diren emaitzak lortuz.

Inauteriak elkarrekin

Osasun-egoerak hobera egin duenez eta Eusko Jaurlaritzak normaltasun zuhurraren alde egindako eskarari erantzunez, ostiralean, otsailak 25, INAUTERI JAIA familiekin ospatzea erabaki du Herri Ametsa ikastolak. 

 

 

Honakoa izango da egitaraua: 

Goizean

LHko taldeak Bidebieta, Altza eta Trintxerpen zehar ibiliko dira gelan prestatutako dantzak erakusten: 

09:25 Ikastolatik Bidebietara oinez jaitsi.

09:50 Dantza Bidebietako futbol zelaian (LH 1-3-6). 

10:30 Dantza Altzako Harrobieta plazan (LH  2-4-5). 

11:30 Dantza Trintxerpeko Gudari plazan (LHko maila guztiak).

11:50 Autobusean ikastolara buelta.

DBHko ikasleek, lehenengo hiru ordutan klasea eman ondoren, mozorro eta esketx lehiaketa izango dute, baita mozorro-desfile lehiaketa ere. Autobusa betiko ordutegian izango da.

Arratsaldean

Haur Hezkuntza eta Lehen Hezkuntzako ikasleek:

Arratsaldeko 15:30ean inauteri jaia ospatuko dute gurasoekin batera Ikastolako harmailetako futbol zelaian. Bertan, 3-12 urte bitarteko ikasleek zenbait dantza eskainiko dituzte.


OHARRAK ETA KONTUAN HARTU BEHARREKO NEURRIAK:


1) Familiak harmailetan kokatuko dira 15:15etik aurrera, lehenengo 4 ilarak libre utzi behar dituzuela gogorarazten dizuegu.

2) Ikuskizuna amaitu ondoren, seme-alabak jaso nahi dituzten familiek argibide hauek bete beharko dituzte (pilaketak saihesteko, ez dira ikasleak ikasgelan jasoko):

HH (3-6 urte): 3 urteko tutoreak arduratuko dira ikasleak parkera eramateaz, eta modu ordenatuan, gurasoak bertan jasoko dituzte.

4 eta 5 urtekoak ikasgelaz gela, abisatuko zaizue eta ikasleak aterako dira futbol zelaira.

LH (6-12 urte): familiak harmailetan itxarongo duzue, eta gelaz gela atera ahala, bertan jasoko dituzue zuen seme-alabak.

3) Gogoratu, arratsaldean kotxez etortzen bazarete, behar-beharrezkoa dela autobusen aparkalekua errespetatzea, beraiek zirkuitua behar bezala bete dezaten. Ez pasa marra horia mesedez.  

4) COVID 19: Oro har, kanpoaldean musukoa erabiltzea derrigorrezkoa ez bada ere, jende pilaketak daudenean, bertaratuak eserita daudenean eta pertsonen artean gutxienez 1,5 metroko segurtasun-distantzia mantendu ezin denean, musukoa jantzi beharra dago.

Zergatik baso eskola?

Urtarrilean abiatu dugu Baso Eskola Herri Ametsa ikastolan, naturak ikasleen garapen integralean eskaintzen duen onuretan sinisten dugulako.

Eraiki, suntsitu, oratu, osatu, landu, zulatu, lurperatu, esperimentatu eta jakin-mina eragiten duten galderak egiten ditugu. Aire zabalean, jolasa ikaskuntza eta hezkuntza prozesua bateratu egiten dira, modu horretan elkarbizitza osasuntsuagoa lortzen da.

Saioak ikastolako eremu naturalean eta inguruan dugun Ulia naturgunean gauzatzen ditugu.  Bertan dugun aberastasuna kontuan harturik, adin desbedinetako haurren beharrei erantzuteko aukera paregabeaz baliatzen gara. Proiektua HH 3-4-5 eta LH 1-2 mailatan gauzatzen da.

Herri Ametsa Talaia bertan behera

Herri Ametsa Talaia Mendi krosa, mendi martxa eta kros txikia bertan behera uztea erabaki dute antolatzaileek. Hauxe helarazi duten mezua:

 

Guraso, lankide, boluntario, babesle, korrikalari zein mendizale agurgarriak, 2021eko urrian HERRI AMETSA TALAIA antolatzeko erabakia hartu genuen eta bidea erraza izan ez bada ere, hilabete hauetan lanean gogoz aritu gara. Gaur egun bizi dugun egoerak, ordea, hausnarketak egitera bultzatu gaitu eta noski, erabakiak hartzera.

Alde batetik, Covid-19ak ikastolan duen eragina eta sor ditzakeen arriskuak kontuan hartuta eta bestetik, ekintzen antolakuntzan ditugun eta sor daitezkeen zailtasunak direla eta, pena handiz, urtarrilaren 30ean ospatu behar genituen HERRI AMETSA TALAIA mendi krosa, mendi martxa eta kros txikia bertan behera uztea erabaki dugula jakinarazi nahi dizuegu.

 

Honenbestez, barkatu erabaki honek sor ditzakeen eragozpenak. Ekintzetan izen-eman duzuen guztiei diru itzulpena egingo zaizue.

 

Besterik gabe, hurrengo edizioan elkar ikusiko garelakoan.

 

Adeitasunez,

 

HERRI AMETSA IKASTOLA

 

Saharako lagunentzat janari-bilketa

S.E.A.D.en Lagunen Elkarteak urteak daramatza Saharako errefuxiatuen kanpamentuetara bidaltzeko janari bilketa egiten eta Herri Ametsa ikastolak aurten ere bere aletxoa jarri nahi izan du. Iaz ezin izan zuten janari bilketarik egin COVID-19a zela eta mugak itxita zeudelako. Gauzak ondo, otsailean jarriko dute martxan trailerrek osatutako karabana. 

 


 

S.E.A.D.en Lagunen Elkartearen eskaerari erantzunez, hegaluzea eta sardinak oliotan, pasta, arroza, azukrea, lekaleak eta konpresak bildu ditu gure komunitateak. Helburua Saharako errefuxiatu kanpamentuetako bizi kalitatea, osasuna eta ongizatea hobetzea eta, era berean, elikadura urritasunak sortzen dituen gaixotasunak gutxitzea da.

 
 

Herri Ametsa Talaia, martxan

Ordu gutxitan amaitu dira Herri Ametsa Talaia mendi krosserako dortsalak eta itxaron zerrenda zabaldu dute. Dena den, gogoratu mendi martxan edo kros txikian parte hartzeko aukera ere badagoela oraindik. Izen-emate guztiak www.herrikrosa.eus webgunearen bitartez egin beharko dira. 

Antolatzaileak oso eskertuta daude eta honakoa adierazi dute krossaren Facebook orrialdean: “Onenak ez diren garai hauetan zuen gertutasuna eta babesa sentitzeak indarra ematen digu”. 

Urtarrilaren 30ean izango da egun handia eta agintarien zein osasun.zerbitzuen jarraibideei kasu eginez eta Osasun Sailak ezarritako protokoloak jarraituz ospatuko ditugu Herri Ametsa Talaia mendi krosa, martxa eta kros txikia Ulia mendian zehar.

EITB Maratoiarekin bat

Herri Ametsa ikastolak, EITB Maratoiarekin bat eginez, Zetak taldearen Zeinen ederra izango den kantaren bertsioa egin du. Ikastolako ikasle eta irakasle guztiek hartu dute parte, Haur eskolatik hasi eta DBH 4. mailaraino. 

Euskararen eguna baliatu genuen ‘gure bertsiorik onena’ grabatzeko eta sekulakoa izan zen. Kantuan, ederki berotu genuen eztarria, azkenengoa bailitzan edota denetan lehenengoa!

Oroitzapenei keinu eginez, Alzheimer gaitzaren ikerketa babestera bideratuko da 2021eko EITB Maratoia elkartasun-kanpainan jasotako dirua. Kontzientzia piztea ere bada egitasmoaren helburua eta guri Alzheimerraren gaia ikasgelan lantzeko bide eman digu.

Fandango eta Arin-arin ikastaroa Gabonetan

Herri Ametsa ikastolan oso gara ameslariak eta, besteak beste, erromeria alai bat antolatzearekin egiten dugu amets. Horregatik, giroa berotzen hasteko, fandango eta arin-arin ikastaroa antolatu dugu. Gabonetako oporretan izango da, abenduaren 27, 28 eta 30ean, Altzako Tomasene Kultur Etxean 11:00etatik 12:00etara. 

8 urtetik gorako haur, gazte zein helduei zuzenduta dago eta izen-ematea doakoa eta irekia da, hau da, ikastolako komunitatetik kanpoko jendea ere ongi etorria izango da. Hori bai, beharrezkoa izango da zuen parte hartzearen berri aldez aurretik jakitea, plaza mugatuak baitira. Horretarako, hiru aukera dituzue: galdetegi hau bete, Casares Kultur Etxera telefonoz deitu (943 35 11 49) edo idatzi (Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.). Bertan ikastatora joatekoak zareten pertsona kopurua eta bakoitzaren adina adierazi beharko duzue. 

Lehendik ere dantzari izan bagara ere, pandemiak erritmoa apur bat moteldu zuen, baina ari gara poliki-poliki bizkortzen. Aurreko ikasturtean curriculumean txertatu genuen euskal dantza eta aurtengoan eskolaz kanpoko ekintzak itzultzearekin batera itzuli dira euskal dantzako saioak ere. Ikastaro hau aukera bikaina izan daiteke eguneroko erritmo azkarrean astirik ez duten guraso zein helduentzat. 

Ea laister plazan topo egiten dugun!

 
Cookien erabilera

Cookie propioak eta hirugarrenenak erabiltzen ditugu zure nabigazioa ahalbidetzeko, gure zerbitzuak aztertzeko eta helburu analitikoetarako, zure nabigazio-datuak aztertuta. Klikatu hemen gure cookien politika ezagutzeko. Aukeratuta dauden Cookie motak onar ditzakezu "ONARTU" botoia sakatuta edo haien erabilera konfiguratu/baztertu Cookie mota bakoitzaren gelaxka aukeratuta.

Cookie teknikoak Pertsonalizazio-cookie-ak Cookie analitikoak Jokabide-publizitateko cookie-ak